Bhangarh (Rajasthan)

Dunia mein aise bahut se sthan hain jahan buri aatmaon ne apna kabza jama rakha hai. Itihaas ke panno ko paltein to ye vahi sthan hai, jo ek samay kaafi khush-haal hua karta tha. Bas ek buri nazar ki vajah se ye sthan shrapit ho gaya, jahan pehle chaaron aur khush-haali hua karti thi vahan yeh sthan aaj andheron ke beech kahin kho gaya.

Aisa hi ek sthan hai Rajasthan ke Alwar zile mein sthit Bhangarh ka qila, jo apni bhootha kahaniyon ko lekar kaafi charchaon mein hai. Shaayad bahut hi kam log yah jante honge ki ye kahani nahin balki ek khatarnaak sachchai hai.

Bhangarh Ka Parichay

  

Bhangarh ka qila, Rajasthan ke Alwar zile mein sthit hai. Iss qile se kuchh kilometer doori par vishwa prasiddh Sariska Rashtriye Udyan (Sariska National Park) hai. Bhangarh teen taraf pahadiyon se surakshit hai. Saamrik drishti se kisi bhi rajya ke sanchalan ke liye yah upyukt sthan hai.Suraksha ki drishti se ise bhaagon mein baanta gaya hai. Sabse pehle ek badi prachir hai jisse dono taraf ki pahaditon ko joda gaya hai. 

Iss prachir ke mukhya dwar par Hanuman ji virajman hain. Iske paschaat baazar prarambh hota hai, baazar ki samapti ke bad rajmahal ke parisar ke vibhajan ke liye tripoliye dwar bana hua hai. Iske paschaat rajmahal sthit hai. Iss qile mein kai mandir hain jisme bhagwan Someshwar, Gopinath, Mangla devi aur Keshav Rai ke pramukh mandir hain. In mandiron ki deewaron aur khanbhon par ki gayi nakkashi se andaza lagaya ja sakta hai ki yah samucha qila kitna khoobsurat aur bhavya raha hoga. Someshwar mandir ke bagal mein ek baoli hai jisme ab bhi aas-paas ke log nahate hain.

Bhangarh Ka Itihaas

 

Bhangarh qile ko Amer ke raja Bhagwant Das ne 1573 mein banwaya tha. Unke marne ke baad yah qila 1913 mein unke chhote bete raja Madho singh ko mila. Madhavsingh ke baad unka putr Chhatr Bhangarh ki gaddi par baitha. Chhatr Singh ke bete Ajab Singh ne sameep hi Ajabgarh banwaya aur wahin rahne laga. Isi vansh ka ek vanshaj Harisingh gaddi par baitha.

Hari Singh ke do bete Aurangzeb ke kaal mein musalman ban gaye the jinka naam Mohd. Kuliz va Mohd Dehliz tha jinhein Bhangarh rajya mila tha. Inke musalman banne va Delhi mein Mughal satta ke kamzor hone ka fayda uthate hue Amer ke maharaja Sawai Jai Singh ne inn dono bhaiyon ko markar Bhangarh par kabza kar liya aur Madho Singh ke hi vansajon ko apne adhin jagirdar bana diya.

Bhangarh Qile Par Kale Jadugar Sindhya Ka Shrap

Bhangarh qila dikhne mein jitna shaandar hai uska ateet utna hi bhayanak hai. Bhangarh qile ki ek prasiddh kahani ke anusar Bhangarh ki rajkumari Ratnawati behad khoobsurat thi. Uss samay uske roop ki charcha poore rajya mein thi or desh ke kone-kone ke rajkumar use vivah karne ke ichchhuk the. 

Uss samay unki umra mahaj 18 varsh hi thi aur unka yovan unke roop mein aur nikhaar la chuka tha. Uss samay kai rajyon se unke liye vivah ke prastaav aa rahe the. Usi dauran rajkumari ek bar qile se apni sakhiyon ke saath bazaar mein nikli thi. Rajkumari Ratnawati ek itra ki dukaan par pahunchi aur wo itron ko haathon mein lekar uski khushboo le rahi thi. Usi samay uss dukan se kuchh hi doori par ek sindhiya naam ka vyakti khada hokar unhein bahut hi gaur se dekh raha tha.

Sindhiya usi rajya mein rahta tha aur vo kaale jaadu ka maharathi tha. Aisa bataya jaata hai ki wo rajkumari  ke roop ka diwana tha aur unse bahut prem karta tha. Vo kisi bhi tarah rajkumari ko haasil karna chahta tha. Isliye usne uss dukaan ke paas aakar ek itra ki botal jise rajkumari pasand kar rahi thi usne uss botal par kaala jaadu kar diya jo rajkumari ke vashikaran ke liye kiya tha.

Rajkumari Ratnavati ne uss itra ki botal ko uthaya, lekin use vahin paas k eek patthar par patak diya. Patthar par patakte hi vo botal toot gayi aur saara itra uss patthar par bikhar gaya. Iske baad se hi vo patthar fisalte hue uss tantric sindhiya ke peechhe chal pada aur tantric ko kuchal diya, jisse uske wahin maut ho gayi. Marne se pehle tantric ne shraap diya ki iss qile mein rahne wale sabhi log jald hi mar jayenge aur vo dobara janam nahin le sakenge aur ta-umra unki aatmaein iss qile mein bhatakti rahengi.

Uss tantrik ki maut ke kuchh dinon ke baad hi Bhangarh aur Ajabgarh ke beech yuddh hua jisme qile mein rahne wale saare log maare gaye. Yahan tak ki Rajkumari Ratnavati  bhi uss shraap se nahin bach saki aur unki bhi maut ho gayi. Ek hi qile mein ek saath itne bade katle-aam ke baad wahan maut ki cheekhein goonj gayin aur aaj bhi uss qile mein unki roohein ghoomti hain.

Qile Mein Suryast Ke Baad Pravesh Nishedh

  

Iss qile ki dekhrekh Bharat Sarkar dwara ki jaati hai. Qile ke chaaron taraf archeological survey of India ki team moujood rahti hai. ASI ne sakht hidayat de rakhi hai ki suryast ke baad iss ilake mein kisi bhi vyakti ke rukne ki manahi hai. Iss qile mein jo bhi suryast ke baad gaya vo kabhi bhi vaapas nahin aaya hai. Kai baar logon ko roohon ne pareshaan kiya hai aur kuchh logon ko apni jaan se haath dhona pada hai.

Qile Mein Roohon Ka Kabza Hai

Iss qile mein katleaam kiye gaye logon ki roohein aaj bhi bhatakti hain. Kai baar iss samasya se rubaroo hua gaya hai. Ek baar Bhartiye Sarkar ne ardhsainik balon ki ek tukdi yahan lagai thi taaki iss baat ki sachchai ko jaana ja sake, lekin wo bhi asafal rahi, kai sainikon ne roohon ke iss ilake mein hone ki pushti ki thi. Iss qile mein aaj bhi jab aap akele honge to talwaron ki tankaar aur logon ki cheekh ko mahsoor kar sakte hain.

Iske alava iss qile ke bheetar Kamron mein mahilaon ke rone ya fir choodiyon ke khanakne ki bhi aawaazein suni ja sakti hain. Qile ke pichhle hisse mein jahan ek chhota sa darwaza  hai uss darwaze ke paas bahut hi andhera rahta hai , kai baar wahan kisi ke baat karne ya ek vishesh prakar ki gandh ko mahsoos kiya gaya hai. Vahin qile mein sham ke waqt bahut hi sannata rahta hai aur achanak hi kisi ke cheekhne ki bhayanak aawaaz iss qile mein goonj jaati hai.

Lothian Cemetery (Delhi)

Purani Delhi mein Kashmiri Gate ke paas sthit hai Lothian Cemetery. Yah kabristan 200 saal se adhik purana hai. Yeh Angrezon ke samy ka Isaiyon ka karistan hai.

Purane record ke anusar ye mana jata hai ki 18vi shatabdi poorv muslim yahan apne logon ko dafnate the. Kyunki Angrezon ko yah sthan bahut bada aur saaf dikha unhone ise Angrezon ka kabristan bana diya. Istemal karne se pehle isey saaf kiya gaya, sabhi purani kabron ko khod kar unke avsheshon ko hata diya gaya. Iss kabristan ka naam uss angrej ke naam par pada jisne Angrezi shasan ke liye ise taiyar kiya tha.

1857 ke vidroh ke dauran isme kai logon ki kabr banai gayi thi. Yahan par kai tarah ke bhooton ki kahaniyan prachalit hain, jaise sir kate bhoot ki. Logon ne aksar aata jaate yahan par ek sir kate aadmi ka bhoot dekha hai. Yahan se kafi jivit vyakti gayab ho chuke hain.

Bataya jata hai ki yah bhoot apne jamane mein Angrez sipahi tha jiska naam Gen. Nicholas tha. Angrez sipahi Nicholas ek Bhartiye mahila, jo ki vivahit thi, se prem karta tha, lekin apni premika dwara thukrae jane par usne khud apne sir par goli maar li thi aur tab se har amavasya ke din uss sipahi ka bhoot iss sthan par tahalta nazar aata hai.

Sanjay Van (Delhi)

Delhi ki ghani aabadi ke beechon beech hai Sanjay Van. Yah van lagbhag 10 KM mein phaila hua hai. Yah van Bhootiya gati-vidhiyon ke liye bhi jaana jaata hai. Din mein to Sanjay Van ki hariyali bahut hi lubhavani lagti hai par andhera hone par utni hi bhayanak ho jati hai. Van mein bahut se sufiyon ki mazar hone ke kaaran Sanjay Van mein gati-vidhiyan dekhi ja sakti hain. Bahut se log har guruvaar ko mazar par mombatti or agarbatti jalate hain. Iss jangal mein bahut saare purane bargad ke ped hain isiliye yahan par aane wale shikari batate hain ki unhone ek aurat ko safed kapdon mein bargad ke ped ke peechhe chhipte dekha hai. Aas-paas ke log batate hain ki kisi aurat ne yahan aatma-hatya kar li thi.

Iss ilake mein bachchon ki aatmaein dikhne ke daave kiye gaye hain jo aksar khelte rahte hain aur yahan unke rone ki bhi aawazein suni hain.

Sanjay van andar se ghana aur bahut daravna hai isiliye raat mein vahan kabhi na jayein.

Feroz Shah Kotla (Delhi)

Delhi ke Feroz Shah Kotla maidan ke nikat hai Feroz Shah Kotla Qila. Iss qile ko 1354 mein Feroz Shah Tughlaq ne banwaya tha. Iss qile ki deewarein lagbhag 15 meter unnchi hai aur diwaron mein bahar ki taraf mamuli dhalan hai.

Mana jata hai ki iss qile mein Djinn rahte hai, jo yahan ghoomne aaye rahgiron ko pareshan karte hain. Yahan har guruwar Djinnon ko shant rakhne ke liye mombattiyan jalai jati hain, maszid ki diwaron par sikke chipkaye jate hain, doodh, mithai, phal aur yahan tak ki mass bhi chadhya jata hai. Itna hi nahin Rahgir yahan patr likhkar jate hain taki Djinn unki samasyaon ko suljha sakein. Yah pratha 1970 mein Laadu Shah ne shuru ki thi jiske baad se yah jagah aabad ho gayi.

Jamali-Kamali Maszid (Delhi)

Dakshini Delhi ke Mehrauli ilake mein ek maszid hai jise jamali kamali maszid ke naam se jaana jata hai. Iss maszid mein solvi shatabdi ke 2 sufi sant Jamali aur Kamali ko dafnaya gaya tha. Sufi sant Jamali Lodhi hukumat ke raj kavi the. Mana jata hai ki Jamali ke makbare ka nirman Mughal shasak Humayu ke raj ke dauran poora kiya gaya. Makbare mein do sangemarmar ki kabr hain, ek Jamali ki doosri Kamali ki. Yah maszid Laal paththar aur sangemarmar se bani hai.

Aisi manyata hai ki iss maszid mein raat ke samay iss veeraan jagah par kuchh jinnh aate hain. Kai logon ka kahna hai ki jinnh yahan maujood logon ke gaalon par thappad marte hain. Kai logon ko yahan vichitr anubhav bhi hue hain.

Khooni Darwaza (Delhi)

Khooni Darwaza Bahadur Shah Zafar marg par Delhi Gate ke nikat sthit hai. Muslim Suri samrajya ke sansthapak Sher Shah Suri dwara banwaye gaye Ferozabad ke liye iss dwar ko banwaya gaya tha.  Yah 15.5 meter uncha darwaza Delhi ke quartzite paththar ka ba hai. Iss darwaze mein teen star han jinpar isme sthit seedhiyon ke madhyam se pahuncha ja sakta hai.

"Khooni Darwaza" jise "Laal Darwaza" bhi kahte hai, bhooton ka thikana maana jaata hai. Yahan par British General William Hudsan ne Mughal vansh ke antim shashak Bahadur Shah Zafar ke beton Mirza Mughal, Mirza Khizr Sultan aur pote Mirza Abu Bakr ko nanga karke unki goli markar hatya kar di thi.



Aisa mana jata" hai ki Akbar ke bete Jahangir ne Akbar ke navratnon mein se ek, Abdul Rahim Khankhana ke beton ko iss gate par marwa diya tha aur unke sareer ko sadne ke liye latka diya tha kyunki Abdul Rahim ne Jahangir ke khilaaf bagawat ki thi.

Aisa bhi kaha jata hai ki Mughal shasak Augangzeb ne apne bade bhai ko rajgaddi ki daud mein pachhad diya tha aur unke kate hue sir ko isi gate par pradarshini ke roop mein latka diya tha.

Aisa bhi kaha jata hai ki jab 1739 mein Paras ke raja Nadir Shah ne Delhi ko loota tha tab iss gate par bahut raktpat hua tha.

Swatantrata ke paschat bhi 1947 ke dangon mein bhi Khooni Darwaze par kaafi raktpat hua tha. Purana Qila sthit camp ki aur jate hue kai sharnarthiyon ko yaha par maut ke ghat utar diya gaya tha.

Kahte hain un sabhi ki aatma Khooni Darwaza ke paas bhatakti hai aur apne saath hue anyaye ka badla lene ki koshish karti hai.

Delhi Cantonment (Delhi)

Paschimi Delhi ka hara-bhara aur sundar ilaka hai Delhi Cantonment jise "Delhi Cant" bhi kaha jata hai. Iski sthapna British-Indian army ne san 1914 ki thi. Delhi Cant lagbhag 10,521 acres (4,258 ha) mein faila hua hai. Cantonement ke bhitar ek railway station hai "Delhi Cantonment railway station" jahan se gadiyan desh ke vibhinn bhgon ke liye rawana hoti hain.

Aisa mana jata hai ki iss ilake mein safed kapdon mein ek bhootni bhatakti hai jo raat mein yahan se gujarne wale motorcycle or car sawaron se lift mangti hai. Agar koi vyakti apni motorcycle ya car rok deta hai to wo gayab ho jati hai. Lekin agar koi vyakti uske lift mangne par nahin rukta hai to uss bhootni ko gussa aa jata hai aur vah gaadi ki raftaar ke saath bhaagte hue uss vyakti ka peechha karti hai aur usey gira deti hai.

Iske kaaran aaj bhi log raat mein yahan se gujarne se ghabrate hain. Iske kaaran iss ilake ko Delhi ka sabse pretbadhit mana jata hai.